Psalms 103
Kaem ninguru nanga kueso ko den
(Devit ko wur bo)
1Ani Kari Biya ko nup patawirikko!Aninga angamang angimik lilim te ani noko nup kualala biya patawirikko.
2Ani Kari Biya ko munan ningo agarak te beteram mu ko me angamili sapurukko,
ani tom suen biya ko iki se ko nup patawirikko.
3Nu aninga memek suen la kutuwuso,
ale aga kuera ikes duap duap suen la nungurso.
4Nu aninga sinar taso se kuerikko lage me arigisam.
Nu gomang aisiso, ale ninguru aga kueso.
5Nu marak sokel yawara aisiso,
se ani taraga nuar ware iwita kulak sokel karogo bagasam.
6Kariimet nungumik mel mena kituwura guat, mu Kari Biya nunga sinar taso, ale den te nunga sangarso.
7Nu ko munan, ko ikia mu Moses kausam,
ale kilek bibiya Isrel te nunga sangukko mu beteram se arigilingiman.
8Kari Biya nu ana tawun biya gomang nangarso ale nanga kueso, ale ana nago ko gomang tairate me magoso,
bare ana ninguru nanga kueso.
9Nu ana ining me nangaru lagoso,
se noko gomang magara mu betela pempem la me aniso.
10Ana nanga memek koma memek tanakko terong la, bare me nangarso,
Ana memek suen biya beteman mu ko koma biyala nangarukko, bare uwutata me beteso.
11Nu kariimet nu ko ikisan mu biyala nunguningkiri nu nunga kueso. Se ko biya mu ali te se tarigi taiti ningi iwitata nunga kueso.
12Koma wes se koma is pingi pingi me anisan, awar bibiya anisan iwitata, nu anananga memek kutuwuso mu pingi me beteso, awar biya nunguningkiri karogo nama beteso ale menawuso.
13Se nuet nu ko kuriang ari nunga kueso iwitatala, Kaem kariimet nu ko ikisan mu nunga kueso ale gomang nungarso nunga sangarso.
14Mu awuk, nu ali gege te la anananga nungam mu nu ikiso.
15Sirsir tom tukunangta baga marakoso iwitata,
anananga tom ali imi te bagara ko mu tukunangta.
16Se tam sisik nunguning beteso se daula ituguso saposo se udagi kuwim yam arigisan iwitata, ana tom tukunangta yawarakala baga kuesan.
17Bare kariimet Kari Biya ko nup patowasan, mu nu nunga amilmiloso mu me menaso.
Se arikaya noko den ikisan ale nongomang ningi nunguning te karo tusan, mu noko amilmil kopa me menarukko,
mu butata nuet te se, nama ko kuriang te se, kuriang ko kuriang te, eng iwita iwita nama lagurukko.
19Kari Biya nu duruk te King ko bagoso,
ale mel singir la nu la bitarso.
20Se nina ko ensel alo, nunup bibiya sokel karogo, nina ko nup kualala biya patowaralko!
Nina ko ura kari ensel alo, ilak duruk te baga se ko kuring karo tusan, mu noko nup patowaralko!
22Se mel kasik biya Kari Biya nungam se sor kasik biya te aitak aniso, mu nina ko nup am patowaralko!
Mu nu king biya, sor suen biya bitarso.
Se ani mu betela ko nup am patawirikko!
Copyright information for
WSK